मुंबई : ज्येष्ठ अभिनेत्री सुहास जोशी यांना यंदाचा विष्णुदास भावे गौरव पुरस्कार जाहीर करण्यात आला आहे. त्यांनी मराठी चित्रपट, दूरदर्शन, नाट्य क्षेत्रात उल्लेखनीय कार्य केले आहे. त्यासाठी त्यांना रंगभूमीवरील मानाच्या पुरस्काराने गौरविण्यात येणार आहे. येत्या दि. ५ नोव्हेंबरला रंगभूमी दिनाचे औचित्य साधून पुरस्कार प्रदान केला जाणार आहे. यंदा दिला जाणारा हा ५७वा गौरव पुरस्कार आहे. पंचवीस हजार रुपये रोख,  स्मृतिचिन्ह, शाल आणि श्रीफळ असे पुरस्काराचे स्वरूप आहे.
           सुहास जोशी यांनी आतापर्यंत २५ मराठी नाटके, दूरचित्रवाहिन्यांवरील अनेक हिंदी आणि मराठी मालिका, मराठी- हिंदी सिनेमांमध्ये आपल्या अभिनयाचा ठसा उमटवला आहे. त्यांना आतापर्यंत नाट्य दर्पण, मराठी ग्रंथ संग्रहालय, व्हिडिओकॉन स्क्रीन पुरस्कार, मुंबई दूरदर्शनचा सह्याद्री नवरत्न पुरस्कार, संगीत नाटक अकादमी पुरस्कार अशा अनेक पुरस्कारांनी गौरविण्यात आले आहे. त्यांच्या व्यावसायिक अभिनयाची कारकीर्द १९७२ मध्ये विजया मेहता दिग्दर्शित आणि जयवंत दळवी लिखित बॅरिस्टर या गाजलेल्या नाटकापासून झाली. त्यानंतर सख्खे शेजारी आणि गोष्ट जन्मांतरीची ही त्यांची नाटके तुफान गाजली. त्यांनी काशीनाथ घाणेकर यांच्यासह ‘आनंदी गोपाळ’मध्ये भूमिका साकारली आहे.
बॅरिस्टरमधील त्यांची राधा, सई परांजपेंच्या सख्खे शेजारीमधील मध्यमवर्गीय गृहिणी या काही महत्त्वाच्या भूमिका आहेत. तेंडुलकरांच्या कन्यादान या नाटकातही त्यांची भूमिका होती. या नाटकात डॉ. श्रीराम लागू प्रमुख भूमिकेत होते. सुहास जोशींनी श्रीराम लागू यांच्याबरोबर केलेली अग्निपंख, नटसम्राट, एकच प्याला ही नाटके गाजली.