tसेलिब्रिटींचं जगणंच वेगळे असते. सतत मेकअप, पार्ट्या, समारंभ, शूटिंग यातून लोकप्रियतेसाठी सतत चर्चेत कसे राहता येईल याचे वेगळेच दडपण. या सगळ्यात वैयक्तिक आयुष्यात त्यांचा संसार, त्यांचे घर हे त्यांचे नोकरचाकरच सांभाळतात असे म्हटले तर वावगे ठरणार नाही. नोकरचाकरांचा लवाजमाच यांच्या अवतीभोवती असतो. गलेलठ्ठ पगार यासाठी स्टाफला दिले जातात.  मागे करिनाच्या तैमूरला सांभाळणाऱ्या आयाला महिन्याला अडीच लाख पगार दिला जात असल्याचे वृत्त होते. आता वृत्त आहे, या सेलिब्रिटींच्या बॉडीगार्ड्‌सच्या पगाराची. होय, ऐश्वर्या रायच्या बॉडीगार्डच्या पगाराचे पॅकेज ऐकाल तर भुवया उंचावतील. शिवराज हा ऐश्वर्याचा बॉडीगार्ड वर्षाला एक कोटी रुपये कमावतो. ऐश्वर्या ही स्टार सेलिब्रिटी असल्यामुळे सतत चाहत्यांचा गराडा तिच्याभोवती जमा होत होतो. म्हणूनच एअरपोर्ट, शूटिंग, परदेश दौरे, बक्षीस समारंभ, खासगी समारंभांदरम्यान शिवराज सावलीसारखा ऐश्वर्यासोबत असतो. बऱ्याच वर्षांपासून शिवराज ऐश्वर्यासाठी काम करतोय. विविध तंत्रज्ञानाचादेखील त्याचा अभ्यास आहे. म्हणूनच बच्चन परिवारात विश्वसनीय सदस्याचे त्याचे स्थान आहे. तिकडे दबंग सलमान खानचा बॉडीगार्ड शेरालादेखील महिन्याला पंधरा लाख पगार दिला जातो. २९ वर्षांपासून शेरा सलमानचे रक्षण करतोय. बिश्नोई गँगच्या धमकीनंतर आता शेराची जबाबदारी चांगलीच वाढली आहे. शाहरुखच्या बॉडीगार्डची तर बातच वेगळी. रवी सिंग वर्षाला २.७ कोटी रुपये कमावतो. आमिरचा बॉडीगार्ड युवराज वर्षाला दोन कोटी  कमावतो. तिकडे दीपिका पदुकोन, अक्षय कुमार, अमिताभ यांचे बॉडीगार्डदेखील कोटीच्या घरात कमावत आहेत.