नाशिक रोडला तरुण सराफ व्यावसायिक बेपत्ता
Written by लोकनामा ऑनलाईन गुन्हेगारी 2024-11-09 14:15:24
लोकनामा प्रतिनिधी
नाशिक : पुणे महामार्गावरील शिंदे गाव येथील रहिवासी व सराफ व्यावसायिक सुशांत ज्ञानेश्वर नागरे (वय २७) गेल्या बारा दिवसांपासून बेपत्ता झाला आहे. याबाबतचे वृत्त असे की, शिंदे गाव येथील रहिवासी सुशांत ज्ञानेश्वर नागरे यांचे शिंदे गाव येथील नायगाव रोडवर सराफी दुकान आहे. २७ ऑक्टोबर रोजी ते आपल्या वडिलांसोबत घरातून जाखोरी येथील शेतावर जाण्यासाठी निघाले. शेतावर पोचल्यानंतर सुशांत नागरे हे वडिलांना म्हणाले की, मी पाणी व खाण्यासाठी काहीतरी घेऊन येतो, असे सांगून आपल्या दुचाकीने निघून गेले. त्यानंतर दहा ते पंधरा मिनिटांनी सुशांत अजूनही का आला नाही म्हणून वडिलांनी चौकशी केली. मी गावातच असून येत आहे, असे सांगून फोन बंद केला. वडिलांनी वाट बघितली. मात्र, सुशांत आलेला नव्हता.
