लातूर : यवतमाळ जिल्ह्यातील वणी मतदारसंघात प्रचारासाठी गेल्यानंतर हेलिपॅडवरच शिवसेना पक्षप्रमुख उद्धव ठाकरे यांची बॅग तपासणी करण्यात आल्याने ते चांगलेच संतापले होते. त्यानंतर मंगळवारी (दि. १२) पुन्हा ठाकरेंची बॅग तपासणी केली. त्यानंतर त्यांनी संताप व्यक्त करत कर्मचाऱ्यांच्या प्रश्नांची सरबत्ती केली.         

  त्यांचे ओळखपत्र व अपॉइंटमेंट लेटरही दाखवण्यास बजावले. या घटनेचा व्हिडिओ स्वत: ठाकरेंनी शूट केला. तो सोशल मीडियावर व्हायरल झाला आहे. उद्धव ठाकरे यांची निवडणूक आयोगाच्या कर्मचाऱ्यांकडून बॅग तपासण्यात आली आहे. त्यावरून त्यांनी संताप व्यक्त केला आहे. आत्तापर्यंत किती जणांची बॅग तपासली, असा प्रश्न संबंधितांना केला. त्यावर, 'तुम्हीच पहिले आहात,' असे उत्तर कर्मचाऱ्यांनी दिले असता, दरवेळेला मीच पहिला गिऱ्हाईक का, असे म्हणत ठाकरेंनी कर्मचाऱ्यांचा व्हिडिओ स्वत:च शूट केला. सोमवारी (दि. ११) वणी मतदारसंघात त्यांची बॅग तपासल्याने राज्यभरातून महाविकास आघाडीच्या नेत्यांकडून या घटनेचा निषेध केला जात होता.