राजी, उरी यांसारख्या चित्रपटांमधून आपल्या अभिनयाची छाप उमटवणाऱ्या विकी कौशलच्या आगामी सिनेमाची उत्सुकता त्याच्या चाहत्यांना नेहमीच असते. ‘छावा’ आणि ‘लव्ह ॲण्ड वॉर’ हे विकीचे दोन सिनेमे आधीच चर्चेत आहेत. पण तरीही विकीने आपल्या चाहत्यांचे प्रेम लक्षात घेऊन त्याच्या आगामी व आणखी एका भव्य चित्रपटाचा फर्स्ट लूक त्याच्या सोशल मीडियावर पोस्ट केला आहे. विकीचा हा नवीन सिनेमा असणार आहे, महाअवतार. या सिनेमात विकी भगवान परशुराम यांच्या मुख्य भूमिकेत दिसणार आहे. ‘महाअवतार’ या सिनेमाचे दिग्दर्शन ‘स्त्री’ आणि ‘स्त्री २’ फेम दिग्दर्शक अमर कौशिक करणार आहे.  हा सिनेमा २०२६ मध्ये   प्रदर्शित होणार आहे. विकीचा आणखी एक आगामी ‘छावा’ हा चित्रपट छत्रपती संभाजी महाराजांच्या जीवनावर आधारित आहे.   या सिनेमाची प्रदर्शनाची नवीन तारीख अद्याप जाहीर झालेली नाही. 
‘महाअवतार’च्या पोस्टरमध्ये विकी साधू अवतारात दिसतोय. त्याच्या चेहऱ्यावर रागीट भाव दिसत आहेत. या सिनेमाच्या मोशन पोस्टरमध्ये विकी पाठमोरा दिसत आहे. त्याच्या मागे भगवान परशुराम यांचे ‘परशू’ हे हत्यार दिसत आहे. विकीचा हा जबरदस्त अवतार चाहत्यांना भुरळ पाडत आहे. त्याच्या या पोस्टवर चाहत्यांनी कमेंट्सचा वर्षाव केला आहे.  ‘ फक्त विकीच या भूमिकेला न्याय देऊ शकतो.  तर आणखी एका चाहत्यानं लिहिलं, “इथं ‘छावा’चा फीव्हर उतरत नाहीये आणि तुम्ही हा ‘महाअवतार’ घेऊन आला आहात. आम्ही या सिनेमाची वाट बघतोय.