पर्थ : विराट कोहलीच्या फलंदाजीचे चाहते जगभर आहेत. जस्टिन लँगरने यापूर्वीच विराटसाठी मैदानात उपस्थित राहण्याचे आवाहन ऑस्ट्रेलियातील क्रिकेट रसिकांना केले आहे.
 आता विराटच्या लोकप्रियतेचा आणखी एक किस्सा समोर आला आहे. ऑस्ट्रेलियात विराटचीच नव्हे, तर त्याच्या बॅटची देखील प्रचंड क्रेझ पाहायला मिळत आहे. बॉर्डर-गावसकर ट्रॉफीच्या पूर्वसंध्येला विराटच्या बॅटने ऑस्ट्रेलियन मार्केटमध्ये खळबळ उडवून दिली आहे. यासंदर्भात एक व्हिडीओ सोशल मीडियावर तुफान व्हायरल होत आहे.
   ऑस्ट्रेलियन पॉडकास्टर आणि यूट्यूबर नॉर्मन कोचेनेक यांनी हा व्हिडिओ शेअर केला आहे. यात  कोहलीच्या एमआरफ जिनियस ग्रँड किंग बॅटची प्रीमियम किंमत अंदाजे १.६४ लाख रुपये  असल्याचे त्यांनी सांगितले आहे. विराटची बॅट ग्रेग चॅपल क्रिकेट सेंटर येथे २९८५ ऑस्ट्रेलियन डॉलर्समध्ये उपलब्ध आहे. विराट कोहलीची  स्वाक्षरी असलेली ही बॅट क्रिकेटप्रेमींना आकर्षित करत आहे. बॅटबरोबर कस्टमाइज्ड बॅग देखील दिली जाते.