लोकनामा प्रतिनिधी :-  

शिरवाडे वाकद :- दत्तनगर लासलगाव येथील एका अल्पवयीन युवतीवर प्राणघातक हल्ला करून जीवे मारण्याचा प्रयत्न करणाऱ्या युवकाला अपर जिल्हा सत्र न्यायालयाने तीन वर्षे सक्तमजुरीची सजा ठोठावली आहे.
          याबाबत सविस्तर वृत्त असे की, पीडित मुलीची आई ( ४०  ) यांनी लासलगाव पोलीस ठाण्यात दिलेल्या फिर्यादीत, आरोपी अतिष दगडु ढगे (  २४,  रा.टाकळी विंचुर, ता.निफाड )  याने दि.६ नोव्हेंबर २०२४ रोजी दुपारी १२.३० च्या सुमारास फिर्यादीचे राहते घरात अनाधिकृतपणे प्रवेश केला. फिर्यादीच्या मुलीस ( वय १७ वर्ष )  'तु तुझे मित्र मैत्रिणी सोबत का फिरते'  असा जाब विचारत,  वाद घालत कुरापत काढली. तसेच मुलीच्या अंगावर चाकू, चॉपरसारख्या धारदार शस्त्राने पोटावर, हाता-पायावर वार करुन मारुन तिस जीवे ठार मारण्याचा प्रयत्न केला.  तसेच स्वतःच्या अंगावर वार करुन आत्महत्या करण्याचा प्रयत्न केला.

        त्यांच्या फिर्यादीवरून   लासलगाव पोलीस ठाण्यात गुन्हा दाखल करण्यात आला होता. अपर जिल्हा व सत्र न्यायालय निफाड यांचे न्यायालयात  यासंदर्भात खटला चालला.  सरकारी वकील म्हणून श्रीमती बंगले मॅडम यांनी  काम पाहिले. तपास अधिकारी म्हणून तत्कालीन सहा.पो.निरी.खंडेराव रजवे व शिवचरण पांढरे यांनी काम पाहिले तर पो.ना किशोर लासुरकर, पो.हवा आर.पी.शिंदे यांनी पैरवी केली. मा.न्यायालयाने आरोपी अतिष दगडु ढगे यांस भा.द.वि कलम ३०७ मध्ये दोषमुक्त, भा.द.वि कलम ४५२ मधे ३ वर्ष सक्तमजुरी व १००० रु दंड व दंड न भरल्यास १ महिना साधी कैद तर भा.द.वि कलम ३०९ मधे ३ महिने साधी कैद व १००० रु दंड तसेच दंड न भरल्यास १५ दिवस साधी कैदेची सजा ठोठावली.
  सन २०१९ मध्येही लासलगावातील भरवस्तीत अल्पवयीन मुलीवर हल्ला झाला होता. तेव्हा हे प्रकरण खूप गाजले होते.