नवी दिल्ली : कधी 'त्यांचे' नाव घेत नाही, कधी त्यांचे नाव तुमच्या सोयीसाठी धडाधड घेता, पण त्याच पंडित जवाहरलाल नेहरू यांनी एचएएल, भेल, सेल, गेल, ओएनजीसी, एनटीपीसी, रेल्वे, आयआयटी, आयआयएम, तेल शुद्धीकरण कारखाने व सार्वजनिक उपक्रमांची स्थापना केली, अशा शब्दांत खासदार प्रियांका गांधी यांनी संसदेत हल्लाबोल केला. लोकसभा पोटनिवडणुकीत काँग्रेसच्या नेत्या प्रियांका गांधी पहिल्यांदाच खासदार म्हणून संसदेत पोहोचल्या आहेत. त्यानंतर शुक्रवारी (दि. १३) त्यांनी लोकसभेत पहिलेच भाषण केले.
          संविधानाला ७५ वर्षे पूर्ण झाल्याबद्दल संसदेत चर्चा करण्यात आली. यावेळी सरकारकडून बोलताना संरक्षणमंत्री राजनाथ सिंह यांनी पं. नेहरूंचा उल्लेख केला नाही. यानंतर विरोधकांनी शेम शेम म्हणत घोषणाबाजी केली. प्रियांका गांधी यांनी आपल्या भाषणात नेहरूंचा धागा पकडत जोरदार पलटवार करत स्वतंत्र भारतात त्यांनी स्थापन केलेल्या संस्थांची आठवण करून दिली. त्या म्हणाल्या, की केंद्र सरकार नारीशक्ती कायदा विधेयकाची अंमलबजावणी का करत नाही? तुम्ही पंडित नेहरूंचे नाव घेऊ नका. जिथे गरज असेल तिथे आपण नक्कीच घेतो. सत्ताधारी पक्षातील मित्र भूतकाळाबद्दल बोलतात. १९७५ मध्ये काय झाले? नेहरूंनी काय केले? अहो, वर्तमानाबद्दल बोला. तुम्ही काय करत आहात ते देशाला सांगा. तुमची जबाबदारी काय? सर्व जबाबदारी नेहरूजींची आहे का? इंदिराजींनी बँका व खाणींचे राष्ट्रीयीकरण केले. काँग्रेस सरकारच्या काळात शिक्षण व अन्नाचा अधिकार मिळाला. जनतेचा विश्वास मिळाला. पूर्वी संसदेचे कामकाज चालायचे, तेव्हा महागाई व बेरोजगारीवर चर्चा होऊन काहीतरी तोडगा निघेल, अशी अपेक्षा होती. कोणतेही धोरण बनवले तर ते देशाच्या अर्थव्यवस्थेला आणि भविष्याला बळकट करण्यासाठी बनवले जाई. आजही संसदेचे कामकाज होऊ दिले जात नाही. पंतप्रधान सभागृहात संविधानाचे पुस्तक कपाळावर लावतात. संभल, हाथरस, मणिपूरमध्ये न्यायाचा मुद्दा उपस्थित केला जातो, तेव्हा कपाळावर सुरकुतीही येत नाही. एक कथा असायची, राजा वेश बदलून बाजारात जायचा आणि लोक काय बोलतात ते ऐकायचा. मी योग्य मार्गावर आहे की नाही? आजचा राजा वेश तर बदलतात, ते शौकीन आहेतच, पण ना जनतेत जाण्याची हिंमत आहे ना टीका ऐकण्याची, अशा शब्दांत त्यांनी मोदींवर प्रहार केला. लोकांची मागणी आहे की, जातनिहाय जनगणना झाली पाहिजे, याचा उल्लेख सत्ताधारी पक्ष करत आहेत त्याचे कारणदेखील निवडणुकीतील निकाल आहेत.