नवी दिल्ली : वयाच्या अवघ्या १८ व्या वर्षी जगज्जेतेपद पटकावणाऱ्या डी.गुकेशवर जगभरातील क्रीडा रसिकांकडून कौतुकाचा वर्षाव होत आहे. जगातील अव्वल सर्वोत्तम म्हणून ओळख असणाऱ्या मॅग्सन कार्लसननेदेखील गुकेशचे कौतुक केले आहे. मात्र, त्याच्याविरुद्ध जगज्जेतेपदाची लढत खेळण्यास  नकार दिला आहे.
    जगज्जेतेपद पटकावल्यानंतरच्या पत्रकार परिषदेत गुकेशने कार्लसनविरुद्ध खेळण्याची इच्छा व्यक्त केली होती. ‘‘जागतिक अजिंक्यपदाची लढत जिंकलो म्हणजे मी विश्वातील सर्वोत्तम बुद्धिबळपटू झालो असे नाही. हा मान कार्लसनचा आहे. त्याच्याविरुद्ध जगज्जेतेपदाची लढत खेळायला मला आवडेल,’’ असे गुकेश म्हणाला होता.
          मात्र ‘‘गुकेशचे यश खूपच खास आहे. ‘फिडे’ सर्किटमध्ये तो मागे पडत होता. मात्र, त्याने चेन्नईत झालेली स्पर्धा जिंकली आणि तो ‘कँडिडेट्स’साठी पात्र ठरला. कँडिडेट्स स्पर्धेतही त्याने चमकदार कामगिरी केली.   आता तो जगज्जेताही झाला आहे,’’ असे पाच वेळचा विश्वविजेता कार्लसन म्हणाला. तसेच  गुकेशची ही इच्छा आपण पूर्ण करू शकणार नसल्याचे कार्लसनने सांगितले. ‘‘मी या सर्कसचा पुन्हा भाग होऊ इच्छित नाही,’’ असे कार्लसनने स्पष्ट केले.