लोकनामा प्रतिनिधी 
नाशिक : नाशिकचा डावखुरा फिरकीपटू सत्यजित बच्छाव याची विजय हजारे ट्रॉफी स्पर्धेकरिता महाराष्ट्र संघात निवड केली आहे. ऋतुराज गायकवाडच्या नेतृत्वात २१ डिसेंबर २०२४ ते ५ जानेवारी २०२५ दरम्यान मुंबई येथे महाराष्ट्र संघाचे साखळी सामने होणार आहेत. प्रथम श्रेणी क्रिकेटची महत्त्वाची ही एकदिवसीय, मर्यादित ५० षटकांची स्पर्धा क्रिकेट नियामक मंडळातर्फे आयोजित करण्यात येते. 
          रणजी स्पर्धेबरोबरच सय्यद मुश्ताक अली टी- ट्वेंटी तसेच एकदिवसीय विजय हजारे ट्रॉफी स्पर्धा या तीनही प्रारूपांत सत्यजित गेल्या काही वर्षांपासून महाराष्ट्र संघाचे प्रतिनिधित्व करत आहे. विजय हजारे ट्रॉफी स्पर्धेत मार्च २०१७ पासून सत्यजित महाराष्ट्र संघातर्फे खेळत आहे. विजय हजारे ट्रॉफी स्पर्धेकरिता याआधीच्या ४० सामन्यांत सत्यजित बच्छावने महाराष्ट्र संघातर्फे ६८ बळी घेतले आहेत.
         भेदक गोलंदाजीबरोबर खालच्या फळीतील आक्रमक फलंदाजीने संघासाठी योगदान दिले आहे. सत्यजित बच्छाव यंदाच्या महाराष्ट्र प्रीमियर लीगमध्ये सर्वाधिक २५ बळी घेत उत्कृष्ट गोलंदाजाचा सन्मान असलेल्या पर्पल कॅपचा मानकरी ठरला होता. 
          सत्यजित बच्छावला महाराष्ट्र क्रिकेट असोसिएशनचा सर्वोत्कृष्ट क्रिकेटपटूचा पुरस्कारही यापूर्वी मिळाला आहे. या निवडीबद्दल नाशिक जिल्हा क्रिकेट असोसिएशनच्या पदाधिकाऱ्यांनी सत्यजितचे अभिनंदन केले आहे.