किरण राव दिग्दर्शित ‘लापता लेडीज’ ऑस्करच्या शर्यतीतून बाहेर पडला आहे. ऑस्करमधील बेस्ट इंटरनॅशनल फीचर फिल्म पुरस्कारासाठी पात्र १५ चित्रपटांची यादी जाहीर झाली. मात्र, या चित्रपटाचा त्यात समावेश  करण्यात आलेला नाही. त्यामुळे भारताच्या पदरी निराशा पडली. तथापि, यावर आता वेगळी चर्चा सुरू झाली आहे. ऑस्करसाठी भारतातर्फे चित्रपट पाठविण्यासाठी चित्रपटाची निवडच चुकली असे म्हणणे आहे. पायल कपाडियाचा ‘ऑल वी इमॅजिन ॲज लाइट’ हा चित्रपट चांगला पर्याय होता, असे मत अनेकांनी व्यक्त केले आहे. सोशल मीडियावर ‘फिल्म फेडरेशन ऑफ इंडियावर’ टीका केली. चित्रपट दिग्दर्शक हंसल मेहता यांनीही यावर नाराजी व्यक्त केली. फिल्म फेडरेशन ऑफ इंडियाने पुन्हा एकदा करून दाखवलं! त्यांचा चित्रपट निवडीचा रेट वर्षानुवर्षे खरोखरच ‘परफेक्ट’ आहे! असा खोचक टोमणा मेहता यांनी त्यांच्या सोशल मीडिया अकाउंटवरून लगावला आहे. अनेकांनी मेहता यांच्या पोस्टला समर्थन केले आहे. “इंडियन फिल्म्स लापता!” शेखर कपूरचा ‘बँडिट क्वीन’ आणि रितेश बत्रा यांचा ‘लंचबॉक्स’ या चित्रपटांचाही विसर फिल्म फेडरेशन ऑफ इंडियाला पडला होता, अशा कमेंट्‌स करून ऑस्करमधील अपयशाची चर्चा रंगली आहे.