नाशिक :- दैनिक ‘देशदूत’चे संस्थापक आणि उद्योजक देवकिसन सारडा यांचे आज ( दि.२० डिसेंबर )  दुपारी अडीच वाजता  निधन झाले.   ते ९२ वर्षांचे होते.  सारडा यांच्या पश्चात दोन मुले, तीन मुली, सुना, नातवंडे, पतवंडे असा मोठा परिवार आहे.

नाशिक शहर, जिल्हा आणि महाराष्ट्राच्या औद्योगिक, सामाजिक, शैक्षणिक, सांस्कृतिक क्षेत्रांत सारडा यांनी भरीव योगदान दिले.  महाराष्ट्र चेंबर ऑफ कॉमर्स, सिन्नर व्यापारी बँक, नाशिक जिल्हा सहकारी बँक, जळगाव जिल्हा सहकारी बँक, नाशिक औदयोगिक सहकारी वसाहत (नाईस), नाशिक औदयोगिक कारखानदार संघ (निमा), ऑस्टीम, नाशिक शिक्षण प्रसारक मंडळ, महाराष्ट्र प्रदेश माहेश्वरी सभा, कुसुमाग्रज प्रतिष्ठान, यशवंतराव चव्हाण महाराष्ट्र मुक्त विद्यापीठ अशा विविध संस्थांवर त्यांनी विविध पदे भूषवली आहेत.  
चतुरस्त्र व्यक्तिमत्व असलेल्या सारडा यांच्या निधनाने नाशिकच्या औद्योगिक, सामाजिक, शैक्षणिक, सांस्कृतिक क्षेत्रांवर शोककळा पसरली आहे.

भाषेचा व्यासंग, विषयांची जाण, चौफेर वाचन ही देवकिसन यांच्या कार्यशैलीची वैशिष्ट्ये होती. त्यांच्या मित्रपरिवारात, देशदूत कुटुंबात ‘ मोठे भाऊ ’ म्हणून ते ओळखले जात.