मुंबई :  भारतीय क्रिकेट संघातील माजी खेळाडू   रॉबिन उथप्पा विरोधात अटक वॉरंट जारी करण्यात आले आहे. ३९ वर्षीय फलंदाजावर प्राव्हिडंट फंड घोटाळ्याचा आरोप आहे. हे वॉरंट पीएफ आयुक्त सदक्षरी गोपाल रेड्डी यांनी जारी केले आहे. रेड्डी यांनी बजावलेल्या वॉरंटनंतर पुलकेशीनगर पोलिसांना आवश्यक कारवाई करण्याच्या सक्त सूचना देण्यात आल्या आहेत.

  सेंच्युरीज लाइफस्टाइल ब्रँड प्रायव्हेट लिमिटेड या कंपनीत रॉबिन उथप्पा व्यवस्थापक आहे. पीएफमधून दरमहा पैसे कापले जात असले तरी ते त्यांच्या पीएफ खात्यात जमा होत नसल्याचा कर्मचाऱ्यांचा आरोप आहे. भारतीय क्रिकेटपटूवर एकूण २३ लाख रुपयांचा गंडा घातल्याचा आरोप आहे. 

नियमांनुसार, कोणतीही कंपनी जी आपल्या कर्मचाऱ्यांचे पीएफ पॅकेट कापते, त्यांना हे पैसे त्यांच्या पीएफ खात्यात जमा करावे लागतात. तसे न झाल्यास ते कायद्याचे उल्लंघन आणि पैशाचा गैरवापर मानला जातो. उथप्पानेही तेच केले आहे. 

पीएफ आयुक्त सदक्षरी गोपाल रेड्डी यांनी ४ डिसेंबर रोजी पुलकेशीनगर पोलिसांना पत्र लिहिले होते. ज्यामध्ये उथप्पाविरोधात अटक वॉरंट जारी करण्यात आले होते. पण पोलिसांनी वॉरंट पीएफ ऑफिसला परत केले की, उथप्पाने त्याचे राहण्याचे ठिकाण बदलले आहे.