लोकनामा प्रतिनिधी
नाशिक : राज्य परिवहन महामंडळाचे (एसटी) उत्पन्न वाढविण्याच्या दृष्टीने जाेरदार हालचाली सुरू असून, त्याचाच एक भाग म्हणून उत्पन्नात वाढ होण्यासाठी चालक व वाहकांसाठी दि. १ जानेवारी ते ३१ जानेवारी २०२५ या कालावधीत प्रायोगिक तत्त्वावर उत्पन्नावर आधारित प्रोत्साहन भत्ता योजना राबविण्याचा निर्णय घेण्यात आला आहे. जास्तीत जास्त उत्पन्न मिळविणाऱ्या चालक व वाहकांना एसटीतर्फे रोख प्रोत्साहन भत्ता देऊन गौरविण्यात येणार आहे. 
            यासाठी प्रत्येक फेरीच्या उत्पन्नाचे उद्दिष्ट देऊन ते पूर्ण करून, अतिरिक्त उत्पन्न आणणाऱ्या चालक-वाहकांना उद्दिष्टापेक्षा वाढीव उत्पन्नापैकी काही रक्कम प्रोत्साहन भत्ता म्हणून दोघांना समप्रमाणात वाटण्यात येणार आहे. ही रक्कम त्यांची कामगिरी संपवून आगारात आल्यानंतर त्याच दिवशी रोख स्वरूपात मिळणार आहे. हा उपक्रम प्रायोगिक तत्त्वावर एक महिन्यासाठी सुरू केला आहे. एसटी महामंडळाने उत्पन्नवाढीसाठी विविध उपयोजना व अभिनव उपक्रम हाती घेतले आहेत. ‘प्रवासी राजा दिन’, ‘कामगार पालक दिन’ यांसारखे उपक्रम राबवून प्रवाशांच्या व कर्मचाऱ्यांच्या समस्या जाणून घेण्याचा प्रयत्न केला आहे. तसेच प्रत्यक्ष प्रवासात प्रवाशांना अडचण आल्यास आगारप्रमुखांचे दूरध्वनी क्रमांक प्रत्येक बसमध्ये प्रदर्शित करण्यात आले आहेत.
          याबरोबरच तोट्यातील आगारांना मार्गदर्शन करण्यासाठी पालक अधिकारी नियुक्त केले आहेत. इंधन बचतीसाठी चालक व यांत्रिक कर्मचारी यांचे समुपदेशन करण्यात येत आहे. शालेय विद्यार्थ्यांना त्यांच्या शाळेत जाऊन पासचे वितरण करण्यात येत आहे. यासर्व उपाययोजनांमुळे एसटी महामंडळाने नोव्हेंबरमध्ये ९४१ कोटी रुपयेइतके विक्रमी उत्पन्न मिळवले आहे. दिवाळी सणाच्या निमित्ताने प्रवाशांची चढ-उतार वाढल्यामुळे तब्बल ९४१ कोटी रुपयेइतके यंदाच्या वर्षातील सर्वाधिक उत्पन्न नोव्हेंबर महिन्यात एसटी महामंडळाला मिळाले आहे. या महिन्यात एसटीने दररोज सरासरी ६० लाख प्रवाशांची वाहतूक करून सुमारे ३१.३६ कोटी रुपये उत्पन्न प्रतिदिन प्राप्त केले आहे. मागील वर्षाच्या याच काळातील उत्पन्नापेक्षा हे उत्पन्न सुमारे २६ कोटी रुपयांनी जास्त आहे. विशेष म्हणजे, मागील वर्षी दिवाळीच्या काळात १० टक्के हंगामी भाडेवाढ करण्यात आली होती. यंदा ही भाडेवाढ नसतानादेखील वाढलेले विक्रमी उत्पन्न हे एसटीवर प्रवाशांनी दाखवलेल्या विश्वासाचे प्रतीक आहे.

अवैध मार्गाचा वापर केल्यास कारवाई

उत्पन्नवाढीत सातत्य राहण्यासाठी चालक-वाहक महत्त्वाचे असून, त्यांची कामगिरी चांगली व्हावी, यासाठी प्रशासन सज्ज झाले आहे. प्रवासी तक्रार, प्रवाशांबरोबरची गैरवर्तणूक अथवा उत्पन्नवाढीसाठी अवैध मार्गाचा वापर केल्यास चालक-वाहक यांना प्रोत्साहन भत्ता मिळणार नाही, असेही महामंडळाने स्पष्ट केले आहे. योग्य कामगिरी करणाऱ्या चालक-वाहकांना प्रोत्साहन भत्ता देऊन त्यांचा सन्मान करण्यात येणार आहे.