मुंबई : राज्यासहित मुंबईतही अपघातांचे सत्र सुरूच आहे. कुर्ला बेस्ट अपघात आणि घाटकोपर टेम्पो अपघाताच्या घटना ताज्या असताना शनिवारीदेखील कांदिवलीत अपघाताची घटना उघडकीस आली आहे. कांदिवलीत मराठी अभिनेत्री ऊर्मिला कोठारे हिच्या कारचा अपघात झाल्याची घटना घडली. ऊर्मिलाच्या कारने दोन मजुरांना उडवले. यामध्ये एका मजुराचा मृत्यू झाला, तर दुसरा मजूर गंभीर जखमी झाला आहे.

           ऊर्मिला आणि तिचा चालक या अपघातात जखमी झाले. मुंबईच्या कांदिवली पूर्व परिसरात ही घटना घडली आहे. शूटिंग संपवून घरी परतत असताना ऊर्मिलाच्या कारचा अपघात झाला. या अपघातात ऊर्मिलाही गंभीर जखमी झाल्याची माहिती पोलिसांनी दिली आहे. पोलिसांनी दिलेल्या माहितीनुसार, गाडीची एअर बॅग योग्य वेळी उघडल्याने अभिनेत्रीचा जीव वाचला. असे असले तरीही तिच्या कारचा मात्र चक्काचूर झाला असून, यामध्ये एकाचा मृत्यू झाला. ज्या मजुरांना ऊर्मिलाच्या कारने उडवले ते दोन्ही मजूर मेट्रोमध्ये काम करणारे होते. मुंबईतील समतानगर पोलिसांनी कारचालकाविरुद्ध गुन्हा दाखल करून पुढील तपास सुरू केला आहे.