लोकनामा प्रतिनिधी
नाशिक : शहरात सन २०२७-२८ मध्ये सिंहस्थ कुंभमेळा होत आहे. त्याच्या शाही पर्वणीच्या तारखांनुसार सूक्ष्म नियोजन करा. आवश्यक वाहतूक व्यवस्था, नियोजित साधुग्राम, नागरिकांची सुरक्षा व घनकचरा व्यवस्थापन या संदर्भातील कामांच्या स्थानिक गरजा लक्षात घेऊन, नियोजित आराखडा राज्य शासनाला सादर करावा, अशा स्पष्ट सूचना राज्य शासनाच्या मुख्य सचिव सुजाता सौनिक यांनी दिल्या.
           नाशिकमध्ये सिंहस्थ कुंभमेळा नियोजनासंदर्भात मंत्रालयात मंगळवारी (दि. ३१) आयोजित उच्चस्तरीय समितीच्या बैठकीत त्यांनी मार्गदर्शन केले. यावेळी वित्त विभागाचे अपर मुख्य सचिव ओ. पी. गुप्ता, परिवहनचे अपर मुख्य सचिव संजय सेठी, नगरविकास विभाग- १ चे प्रधान सचिव असिमकुमार गुप्ता, नगरविकास विभाग- २ चे प्रधान सचिव डॉ. के. एच. गोविंदराज, पर्यावरण व वातावरणीय बदल विभागाचे प्रधान सचिव प्रवीण दराडे, नाशिकचे विभागीय आयुक्त डॉ. प्रवीण गेडाम, पर्यटन संचालक डॉ. बी. एन. पाटील, नाशिकचे जिल्हाधिकारी जलज शर्मा, नाशिक महापालिका आयुक्त मनीषा खत्री, राज्य परिवहन महामंडळाचे व्यवस्थापकीय संचालक डॉ. माधव कुसेकर यांसह विविध विभागांचे अधिकारी बैठकीला उपस्थित होते.
          सौनिक म्हणाल्या की, सिंहस्थ कुंभमेळ्याच्या तारखा लक्षात घेऊन पायाभूत सोयी-सुविधांची कामे, साधुग्राममध्ये साधू-महंतांची निवासव्यवस्था, वाहनतळ उभारणे, नागरिकांची सुरक्षा, कायदा व सुव्यवस्था, परिसर सुशोभीकरण, गोदावरी नदी व उपनद्या संवर्धन, शुद्धीकरण व सुशोभीकरण, ग्रीन झोन, गर्दीचे सनियंत्रण, आरोग्य तसेच सिंहस्थ कुंभमेळ्याच्या पार्श्वभूमीवर इतर आनुषंगिक कामे याबाबत स्थानिक प्रशासनस्तरावर बैठका घेऊन कामे अंतिम करून त्याचा आराखडा राज्यस्तरावर सादर करावा. सिंहस्थ कुंभमेळ्यासाठी कामांचे सूक्ष्म नियोजन करावे. कुंभमेळ्याच्या नियोजनासाठी जिल्हा व राज्यस्तरावरील कामांचा आढावा घेण्यासाठी ठराविक कालावधीत बैठका आयोजित केल्या जाव्यात. सर्व यंत्रणांना सोबत घेऊन काम करावे. या कामांबाबत उच्चस्तरीय समिती स्थापन करावी जेणेकरून नियोजित कामांत आवश्यक तिथे सुधारणा करण्यासाठी मदत होईल, अशा सूचनाही त्यांनी केल्या.